Að vera traustsins verður.

Nú hefur nýtt framboð litið dagsins ljós í Norðurþingi, Þinglistinn- listi óháðra í Norðurþingi sem er óháð allri flokkapólitík á landsvísu. Framboðið mun hugsa fyrst og fremst um hagsmuni Norðurþings og íbúa þess nái það áhrifum í sveitastjórn Norðurþings. Ég er afar stoltur af þessum lista sem nú er kominn fram, það hefur verið afar gott að vinna með þessu fólki sem situr á listanum.

 

Áhugi minn á sveitastjórnarmálum sem og að gera samfélagið okkar betra er mikill.  

Fyrir sveitastjórnarkosningarnar 2006 var mér boðið seta á lista Sjálfstæðisflokksins og óháðra sem ég þáði  af tveimur ástæðum annars vegar vegna þess að óháðir gátu setið á honum þar sem ég vildi ekki  vera flokksbundinn og hinsvegar vegna þess að mitt aðaláhugamál er uppbygging stóriðju og nýting þeirra orku sem hér er í heimabyggð. Sjálfstæðisflokkurinn á landsvísu studdi þetta verkefni okkar í orði og sá ég að þar væri ég ágætlega staðsettur til að vinna í þessu verkefni vegna þeirra tengsla sem væri á milli D-lista sjálfstæðisflokks og óháðra og móðurflokksins þar sem að hann sat í ríkisstjórn þá. Sá semsagt að ég gæti látið gott af mér leiða fyrir sveitarfélagið og íbúa þess með þessi tengsl að vopni. Áhuginn hjá mér á stóra verkefninu á Bakka  var og er mikill en mér fannst vanta áhugann hjá alþingi og þingmönnum þessa kjördæmis. Hann var mestur hjá þeim blessuðum þegar að þeir sátu hér á fundum þar sem enginn gat náð eyrum þeirra nema heimamenn.

Ég gagnrýndi þetta oft og vildi fá miklu meiri stuðning fyrir þessu verkefni hér heima og opinberlega.

 

Þessi tengsl á milli Sjálfstæðisfélagsins og móðurflokks sem ég hafði trú á fór þverrandi. Ég taldi best að fara nota aðra herkænsku en áhuginn fyrir því var lítill því miður. Ekki þótti gott að fara rugga einhverjum bátum og þingmenn lofuðu að vinna í málinu, ýta því áfram og þess háttar. Sveitastjórnarfulltrúar vildu frekar treysta á þingmenn síns flokks en að grípa til beinna aðgerða sjálfir. Það er reyndar afar spaugilegt en samt grafalvarlegt að sá þingmaður sem átti og ætlaði að vinna í þessum málum var forseti bæjarstjórnar Akureyrar á þessum tíma. Ég eins og Akureyringar ætlast til þess að kjörnir sveitarstjórnarfulltrúar/bæjarstjórnarfulltrúar  vinni fyrst og fremst fyrir sitt sveitarfélag eins og forseti bæjarstjórnar Akureyrar á að gera fyrir Akureyri.

 

Stórt áfall reið yfir Bakkaverkefnið þegar að Þórunn Sveinbjarnardóttir setti verkefnið í sameiginlegt umhverfismat. Ég vildi strax að þessi ákvörðun Þórunnar yrði kærð án tafar en enginn vilji var fyrir því. Ekki þótti ráðlegt af þingmönnum okkar að beita sér inn í ríkisstjórn eða rugga bátum það hefði ekkert upp á sig því þessi ríkisstjórn Sjálfstæðisflokks og Samfylkingar færi ekki á límingunum út af þessari ákvörðun Þórunnar. Þarna sá ég áhugann fyrir þessu verkefni inn á alþingi  Ekki mátti styggja þessa háu herra með að þrýsta á þá.

Frekar að láta sveitarfélagið blæða út fjárhagslega og bíða. Bíða eftir hverju? Missa verkefnið? Það var og er enginn vilji fyrir þessu verkefni okkar, þetta verkefni er notað sem skiptimynt í stjórnarmyndunarviðræðum sama hvort heldur flokkurinnn heitir Sjálfstæðisflokkur eða eitthvað annað. Sveitarfélagið dregið of lengi á asnaeyrunum fyrir einhver loforð sem aldrei var vilji til að efna.

 

Ég hef fengið það á mig að vera ekki traustsins verður fyrir það að rápa inn og út úr sjálfstæðisflokknum í tíma og ótíma sem er afar skondið og skemmtileg fullyrðing. Ég hef gengið þrisvar í flokkinn og þrisvar úr flokknum, man ekki í augnablikinu hvenær ég var skráður í flokkinn fyrst en það var fyrir mörgum árum síðan. Fyrsta skiptið sem ég gekk úr flokknum var vegna sölu á togurum Höfða h/f og sameiningu þess félags við Fiskiðjusamlags Húsavíkur á sínum tíma sennilega í kringum 1996 og í framhaldi kaupin á Húsvíkingi Þ.H 1 en þessi gjörningur var gerður af meirihluta Framsóknar og Sjálfstæðis og algjörlega út í hött og var upphafið að endinum sem orsakaði það að við misstum tökin á Fiskiðjusamlagi Húsavíkur og kvótanum.

Það má nefna fleiri dæmi t.d. rækjuverksmiðjuna sem reist var í Kanada og afskrifuð á einu bretti stuttu síðar.

 

Annað skiptið sem ég gekk í flokkinn var árið 2007 í prófkjöri flokksins til alþingiskosninga þegar að ég vildi stuðla að því að Sigurjón Benediksson kæmist á alþingi. Ég gekk strax eftir það úr flokknum vegna þess að ég vildi vera óháður áfram.

Í þriðja skiptið gekk ég í flokkinn vegna þess að mér var boðið að sitja landsfund sjálfstæðisflokksins sem haldinn var að mig minnir 2007 ég taldi það rétt að prófa það og hvort ég gæti þá í leiðinni komið okkar verkefni á Bakka áleiðis í gegnum landsfundinn og þar inn í ríkisstjórn. Fljótlega eftir fundinn gekk ég svo úr flokknum af sömu ástæðu og áður þ.e.a.s að ég vildi vera óháður áfram. Þetta eru þær ástæður fyrir því að ég gekk í og úr flokknum. Ef ég er ekki traustsins verður fyrir þetta verður svo að vera.

 

Einnig hefur verið reynt að gera þá ákvörðun mína að segja mig úr skipulags og byggingarnefnd tortryggilega en eftir setu mína í nokkurn tíma sá ég engan tilgang með setu minni þar. Mig langar að nefna hér þrjár helstu ástæður fyrir úrsögn minni úr þeirri nefnd en nokkur önnur  dæmi er hægt að nefna hér einnig líka en læt það vera. Ég vill byrja á því að nefna það hér að þessi nefnd er  lögboðin nefnd sveitarfélaga og verða því öll skipulags og byggingarmál að fara fyrir hana áður en framkvæmdir hefjast.

 

1.  Ákveðið hús hér í bæ var tekið fyrir í Skipulags og bygginganefnd og veitt leyfi fyrir byggingu þess, sex dögum seinna á ég leið um þessa lóð og stóð þá þetta hús sem samþykkt var sex dögum áður fullreist og fokhelt.

Ég er sjálfur iðnaðarmaður og veit að ekki er hægt að reisa slíkt hús á sex dögum og gera fokhelt.

Ég gerði alvarlega athugasemd við þetta við yfirvöld á sínum tíma og krafðist þess að gripið yrði til þeirra refsingar sem ætti við í slíkum málum en ekkert varð úr því og málið svæft.

 

2. Inn á borð skipulags og byggingarnefndar kom erindi frá Hvammi heimili aldraðar sem sótti um lóðina við Pálsgarð, sótti Hvammur um alla lóðina og var þetta erindi samþykkt. Í sveitarstjórn var þessari ákvörðun skipulags og byggingarnefndar breytt þannig að Hvammur fengi einungis helming þess lóðar sem var búið að úthluta Hvammi. Þessi ákvörðun sveitastjórnar að mínu mati brýtur stjórnsýslulög,  í þessu tilfelli hefði sveitastjórn átt að hafna erindinu og Hvammur að sækja um lóðina aftur og þá í gegnum skipulags og byggingarnefnd. Ég gerði einnig athugasemdir við þetta en eins og áður var ekki hlustað.

 

3. Ég var skipaður í ferlinefnd sem er hliðarnefnd við skipulags og byggingarnefnd um ferlimál fatlaðra, á fyrsta ári var samþykkt fjárveiting fyrir einni milljón og var framkvæmt fyrir þá upphæð það ár, annað árið var sama upphæð samþykkt og ekkert gert. Ástæðan fyrir því var sú að peningar sem ætlaðir voru í þennan málaflokk voru notaðir í annað. Gerði ég einnig athugasemdir við þetta en ekkert gert, málið svæft. Þegar að ljós kom að þessi lögboðana skipulags og byggingarnefnd sveitarfélagsins var einmitt bara hugsuð til þess að uppfylla þau skilyrði að hún ætti að vera til en samþykktir hennar ekki alltaf virtar sá ég enga ástæðu til að sitja í þessum nefnd lengur, eyða tíma og fjármunum sveitarfélagsins til einskis. Embættismannavaldið réði því sem það vildi ráða.

 

Svona í lokin þá hef ég haft gaman af fyrrverandi pólitískum félögum mínum sem eru farnir að lofa fyrir Þinglistann kosningarloforðum til þess eins að gera lítið úr listanum og því fólki sem að honum vinnur. Ég hefði viljað að loforðin sem listinn kemur með fram verði gerður af því fólki sem stendur að Þinglistanum og í hans nafni það er lágmarks kurteisi við það fólk sem vinnur að listanum.  

 

Með kveðju

Áki Hauksson

Athugasemdir

[Hulda Haraldsdóttir, 15.4.2010 kl. 02:35]

Heill og sæll kæri Áki og velkominn í bloggheima. Eins og má lesa í bloggfærslu minni, fagna ég ég þessu nýja afli í Norðurþingi og mér þykir miður að geta ekki stutt framboðið eins og ég hefði óskað en get þó fjallað um það hér.  Mér finnst rökin sem fyrir vantrausti á þér alveg frámunalega heimskuleg í mínum huga er það að skipta um skoðun vera merki um styrk en ekki öfugt.

Hins vegar bíð ég ennþá eftir því að þú skiptir um skoðun varðandi Bakka enda tel ég svo æði margt sem hægt er að gera til að efla uppbyggingu og atvinnu á annan hátt en með stóriðju.   

[Hulda Haraldsdóttir, 16.4.2010 kl. 16:07]

Hvernig er það nú, á ekki að samþykkja vinabeiðnina ?? eða ertu bara orðinn svona snobbaður ?  (ég mátti til)